佢身手好過《狙魔人》、查案勁過《B+偵探》。佢，係全球最強嘅「屍家」偵探─D哥！由著名靈異漫畫“Dylan Dog”改編；《超人強戰回歸》絕世型男班頓洛夫(Brandon Routh)，飾演型格神探D哥；配上《地心探險記3D》性感索女安妮妲柏寧(Anita Briem)、搞笑高手森赫德頓(Sam Huntington)，實行齊齊緝兇！《西部天煞反擊戰》、《戰狼300》特技精英，聯同《未來戰士2018》、《超人強戰回歸》皇牌監製，“喪爆”打造群魔大亂鬥！今個夏天最搞嘢嘅漫畫改編作品─《D+偵探：吸血‧人狼‧喪屍城》！
三更半夜咪嚇親 靈異角色四圍騰 喪屍助手勁失魂 驚天陰謀殺埋身！？
全城最紅嘅「屍家」偵探D哥，專門偵破鬼靈精怪嘅棘手奇案；但佢今次終於遇上難題！話說靚女伊莉莎伯嘅老豆被殺，諗住搵D哥幫手破案。以為可以「神速」搞掂嘅Easy Job，竟然觸發起殭屍、人狼、喪屍三族互相猜忌，一場妖魔界大混戰如箭在弦！最慘係爛Gag助手孖吉又無端俾喪屍咬死，變埋活死人四圍惹麻煩…愈查愈離奇，莫非有人搞事要令滅世魔王破印重生？一大堆問題，就等D哥帶齊各式獵魔架生，直闖「活死人凶間」搞掂班大怪物！
現代最強妖魔偵探登場！ 《D+偵探》主要人物介紹
型男偵探 D哥(班頓洛夫 飾)
大隻靚仔、周身法寶；妖魔界唯一認可嘅人類偵探。當年因為未婚妻被殺而退隱。直到伊莉莎伯力邀佢重出江湖，解決一場牽涉人狼、殭屍、喪屍三族嘅滅世危機。
喪屍助手 孖吉(森赫德頓 飾)
平日吹水唔抹咀，希望成為D哥嘅頭馬兼拍擋。俾喪屍咬咗啖後，孖吉最愛蒲“喪屍BODY SHOP”換人體零件，但經常手腳失控搞破壞。由於喪屍擁有不死身，於是有咩「依郁」，D哥都會「借啲易」揾佢擋子彈。
索女委託人 伊莉莎伯(安妮妲柏寧 飾)
電影入面唯一人類女主角；亦係案件嘅委託人。因為父親被人狼所殺而揾D哥「出山」幫拖。連場冒險，兩人其後更發展出戀情。
吸血大拆家 維加斯(泰迪格斯 飾)
多年前，D哥為報未婚妻被殺之仇，將上代真血族大佬冚家埋單，造就維加斯上位揸棍做龍頭。接手後，佢專門販賣殭屍血導人類上癮，謀取暴利，堪稱屍界毒品大亨！
人狼大當家 加比(彼得史特曼 飾)
城中4大人狼家族之一─「施洛氏」嘅大佬兼D哥老友。身懷絕世秘寶彼烈之心嘅秘密，因而導致乖女被殺，自己亦惹來殺身之禍！
現代鬼城新奧爾良 住客全部唔係人
為你介紹《D+偵探》三大妖怪種類
D哥身處嘅新奧爾良城，可謂百鬼橫行。你聽過嘅妖魔鬼怪乜都有，以下就係幾種經常圍繞D哥身邊嘅妖怪種類，各有特色：
喪屍
全天候24小時都可以自由活動。喺喪屍世界，「洗地水係香體露，洗衣粉當番梘用」。智商低，性格膽小怕事，但天生係掘地專家。平日只敢偷死屍嘅殘肢嚟用；亦只可以食屍蟲、蚯蚓當食糧。
代表：孖吉
吸血殭屍
入黑時份就係佢哋嘅世界。頭腦靈活，更加識得飛天爬牆；身上嘅血更加可以令人類長生不老，令佢哋上癮。
代表：維加斯、頭馬 洛加
人狼
分為多個唔同黨派。新奧爾良城中就有4大家族聚居。攻擊力強，身手敏捷；最鍾意藏身樹林當中，作掩護攻擊。現存大多數人狼，都擁有自由控制變身嘅能力。
代表：加比、加比仔仔 狼友
三更半夜仲未瞓？ 隨時歡迎光臨！
《D+偵探》妖魔鬼怪夜蒲點 為你介紹
原來除咗人類鍾意喪玩喪蒲，妖魔鬼怪都有自己嘅地方平時Happy Hour，即刻睇吓：
屍界Dragon-I 屍家吧
殭屍界嘅熱門蒲點，晚晚門口都大排長龍。內裡五光十色乜都有，更加係殭屍大佬維加斯販賣毒品殭屍血嘅地方。
魔界五豐行 施洛氏肉類公司
由人狼施洛氏一族現任揸fit人─加比所經營。專門提供高級凍肉俾方圓百公里內嘅人狼「同鄉」享用。D哥亦係憑住呢個線索，先揾到殺害伊莉莎伯父親嘅真兇。
另類二手店 喪屍Body Shop
由「喪屍線人」大AL所開嘅Body Shop，專門搜集來自美國東西岸嘅新鮮人體殘肢，天天運送，保證優質。喺呢度，D哥除咗可以索到第一手有關妖魔界嘅資料外，更加幫孖吉揾到啲啱佢用嘅「零件」。
死咗至幫得你手！ 喪屍合作社
由《活死人同盟》所開辦嘅「喪屍合作社」，特別為孖吉呢類死鬼咗但仲以為自己生勾勾嘅活死人而設。提供一站式服務，包括敎你點樣保持「零件」新鮮唔發臭；同分享活死人心得，食乜最滋補等等。唔講唔知，佢哋嘅快餐店仲特設「超值套餐」，提供蚯蚓全餐、蟲蛹餅加一杯熱氣油，簡直豐富過老麥！
絕密解構！D哥“屍人”法寶曝光
屍家木子彈
專為真血族彊屍硏製；木材100%有機無添加，適用於任何類型槍械發射；保證一槍貫穿彊屍心口。
快逃鎂光彈
外表疑似「殺x死」殺蟲水；據報能放出接近太陽光芒嘅光熱射線，真血族殭屍“必避”之物！
狼死銀拳箍
利用天山純銀，再交由內地“血汗工場”員工經七七四十九日，不眠不休打造而成。人狼一旦被擊中，傷口就會被腐蝕冒煙，明符其實“唔死一身孱”！
D+百寶箱
內藏各式「AA+」靈異界查案道具，更獨家珍藏不同人狼家族嘅毛髮樣本；唔理老毛定嫩毛，一經對照，屬於邊個人狼家族，統統無所遁形。
現代天師裝
咪以為D哥造型亂著一通，其實經過精心計算。西裝褸，用嚟隱藏殺氣，同《食神》張摺櫈有異曲同工之妙；紅色裇衫，夠哂搶眼，嚇退牛鬼蛇神；牛仔褲，更加係十樓跌落嚟都無穿無爛，防護性能超勁強。要捉鬼，衣櫃梗要有一套旁吓身！
除咗以上嘅法寶之外，喺《D+偵探》嘅世界入面，仲有兩樣闗乎滅世災難嘅寶物，隨即掀起連場殺戳，搞到滿城風雨：
彼烈之心
傳說中心位置收藏着終極惡魔「彼烈」嘅血液。任何殭屍，只要注入魔血，就能令「彼烈」重生，滅絕人類，堪稱妖魔世界嘅秘寶；明顯同近日連串殺人事件有關！
至殭版Botox
據非正式醫學硏究，效果勁過Botox。從殭屍身上直接提取嘅鮮血，天然純正；凡人一啪即上癮，兼身負短暫殭屍能力，長生不老；貪靚女士們必備恩物。
歐洲超人氣靈異漫畫 原著風魔全球粉絲24年
1986年開始連載嘅“Dylan Dog”，由意大利漫畫家Tiziano Sclavi所原創。24年來，“Dylan Dog”已經出版過超過224期；經年銷量高達5千6百萬冊，緃觀全球亦只有少數漫畫系列嘅成績能夠與此媲美。
與漫畫版略有不同，原著漫畫以倫敦街頭作為背景，充滿哥德式懷舊風格，並不時橫跨於歐洲各個城市，破解懸案；相反，電影版故事就將主角D哥打造成新奧爾良嘅靈異神探。儘管如此，但兩者嘅主題思想依舊不變。D哥每次除咗要應付各式各樣嘅妖魔鬼怪，例如科學怪人、吸血伯爵之外；但真正令佢身陷險境嘅，卻係更陰險、更難應付嘅敵人─人類。
電影資料
電影名稱：D+偵探：吸血‧人狼‧喪屍城 (Dylan Dog Dead Of Night)
導演：奇雲梅洛(Kevin Munroe)
上映日期： 2011年7月28日
香港發行：洲立影片發行(香港)有限公司
圖片集
