[購物Q&A] MicroSDHC記憶卡 選購疑問全解答!

手機同平板電腦興起，大家都會購買 MicroSDHC 記憶卡增加儲存空間，雖然照住容量黎買無乜難度，但每當要考慮 Class規格時，眼見腦場好多人都存有疑問，所以本網將會加開「購物Q&A」新欄目，透過簡單易明方法解答大家係腦場買野疑難，而今次會先講下 MicroSDHC 記憶卡規格分別，等大家下次買卡唔洗再左度右度!

Q1.) Class係咩黎?

大家去腦場選購 MicroSDHC 記憶卡，除左牌子同容量大細，仲有 Class 規格可以選擇，咁 Class 究竟咩黎呢? 首先，Class 係一個速度指標，記憶卡除左容量，讀寫仲有分快同慢，讀寫越快代表傳送或讀取需時越短，過歌過片唔洗等咁耐，同時手機或平板上開Apps都會快少少，簡單講越快就越好。

Q2.) 唔同Class有咩分別?

Class 作為速度指標，背後自然內含數字來分辨快慢，正如市場常見的 Class 4 或 Class 10 規格，意思指寫入速度不低於 4MB/s或10MB/s，兩者幅度大約相差一倍。至於近年才有的 UHS-I，性質同 Class 都係用作辨識速度的單位，但速度會比 Class 級別更快，速度最少都由 50MB/s 起跳，所以特別適合用作高清攝錄等用途，因此速度上 UHS-I > Class 10 > Class 4。

Q3.) 咁UHS-I係咪最好?

雖然已知 UHS-I 速度最快，但即使大家唔考慮價錢，最快亦唔一定最好。全因 UHS-I 屬新興規格，好多裝置包括讀卡器、手機及平板電腦都未必支援，最終可能會降速運作，令大家浪費金錢。因此大家想買快卡建議都係 Class 10 為上限，一來價錢同 Class 4 相差僅幾十蚊，而且又唔洗特別讀卡器支援。當然如果純粹要黎儲歌儲影片唔洗行Apps，咁買張大容量 Class 4 都夠玩了。

專題後記:

解答過幾條 MicroSDHC 記憶卡問題後，相信大家都會瞭解讀寫規格係咩一回事。當然係人都知越快越好，但如果裝置唔支援，即使購買 UHS-I 都係無用，加上現時好多手機或平板電腦都內建 8GB 或 16GB 儲存空間，買得 MicroSDHC 都係純粹儲歌、相片等資料，所以為求安心選擇 Class 10 應該最穩陣，否則 Class 4 都唔會有問題，最終都係要黎儲野o者!