Mygica MP506 迅雷下載 影片任睇

現時 RVMB 播放器款式繁多，由簡單播放 RMVB 格式到支援 HDMI 高清輸出都林林總總，但來去都要依靠電腦下載才可收看。不過，最近 Mygica 推出首款支援「迅雷下載」的同類播放器，重點係連接上網就可以下載影片，從此唔開電腦都可以睇個飽!

Mygica MP506 規格表

	Mygica MP506
輸出介面	● 1x HDMI (720p) ● 1x Component (720p) ● 1x S-Video ● 1x RCA
輸入介面	● 1x USB 2.0 ● 4 in 1 讀卡器 ● RJ45 網絡接頭
支援格式	● 影片格式 – RM/RMVB (1024×576) – MPEG1/2, DAT, AVI, DIVX, VOB (720×576) ● 音效格式 (MP3, WMA) ● 相片格式 (JPG, BMP, PNG)
特別功能	● 迅雷下載 ● 文字輸入搜尋
價錢	● $638 建議零售價

.

Mygica MP506 就係首款支援「迅雷下載」既 RVMB 播放器，外表平庸，但就提供各式輸出包括 HDMI、色差等各一組，當然唔少得機背既網絡接頭。除此之外，機前提供一系列按鍵面版，另備有遙控器方便操作，兩者均可完整操作播放器，其次配件就只有色差線、火牛等，頗為簡單。

當接好所有線後，一開機就已經見到三個選項，分別係「U盤」、「迅雷下載」及「設定」。「U盤」即是大家接上的 USB 儲存裝置，按後就會見到裝置內的影片及音效檔案。至於「設定」，就係牽涉輸出規格、語言等設定，基本上開機後畫面無異常就可無須理會。

最後按入「迅雷下載」就會見到迅雷專用介面，除了檢視及下載管理外，想清單就要進入「熱片推薦」，清單會以港產片、西片、日韓戲集等分門別類，按入任何一欄都會見到該類別最新既影片。當揀好心水影片後，再按就會見到下載來源，同一套影片會列出唔同畫質及檔案體積等資料，用戶只須按任何一個就會開始下載，直到完成就收看影片，介面都算簡單易用。

若用戶想搜尋落畫影片，MP506 都有提供搜尋功能，文字可以筆劃及普通話拼音方式輸入，並會透過影片資料庫列出最相近既結果，故此無論新舊片只要迅雷有就幾乎唔會錯過。

試玩後感: 創新概念 無腦下載

Mygica MP506 作為 RVMB 播放器，最突出係支援「迅雷」直接下載影片收看，即使唔開電腦都可以煲劇煲到夠。至於筆者覺得不設 D-Sub 輸出及繁中介面係 MP506 既小缺點，除此之外整體都大致完善。不過，下載影片始終存在侵犯版權既風險，若然日後可以支援 PPStream 等網上電視台就更安全了。

查詢：Everbest Technologies（2544 8280）