- Advertisement -
過往電腦節係每年舉辦兩次既大型展銷活動，但唯獨 09年電腦節就一共舉辦四次之多，令唔少腦場舖頭都怨聲載道。經過早前「荃灣嘉年華」後，本日就有中型連鎖店 「緯達電腦科技公司」正式全線結業，是繼本年 4月電腦節旺電 Pro-One 結業後，另一大型結業活動。
 |
 |
行過「黃金」相信對「緯達電腦」都唔會陌生，係 3C 勢力係黃金形成前都算有點影響力，當中以售賣廉價硬碟產品最為人熟識。不過，自從 Centralfield 進軍黃金及電腦節頻頻舉行，無疑令「緯達電腦」形成兩難局勢。或許消費者覺得汰弱留強係理所當然，但從舖頭角度試想下，強敵壓境，又有電腦節搶走人流，而售賣產品又一式一樣，試問又點能夠生存呢？
這次「緯達電腦」突然全線結業，受影響除左黃金地庫兩間分店外(其中一間較早前已拉閘)，還有「灣電」一樓及二樓分店，論規模計都算係中型。本網記者已看到代理開始將貨運走，但代理有否因而損失就仍係未知數。至於近期有係「緯達電腦」購買產品或落單砌機既網友，就記謹與有關公司或部門連絡。
至於「緯達電腦」結業同時，相信大家都已聞即將 1月頭又有電腦節舉行，選址會係長沙灣運動場，與剛完結既「荃灣嘉年華」只係 2個月之隔。腦場消息人士指出 1月電腦節，將會影響 12月聖誕假期既消費力，幾乎每次電腦節舉行前一個月腦場都係水靜河飛，試問一年搞足 4次，舖頭又點生存落去。
「緯達電腦」查詢電話:
深水埗黃金分店: (3153 5311)
深水埗維修中心: (3153 5315)
灣仔灣電分店(1/F): (2891 3186)
灣仔灣電分店(2/F): (2891 3286)
灣仔維修中心: (2891 3706)
公司寫字樓: (2152 9401)