《奪命狂呼4》4月14日　嚇“4”你！

2011 全新《奪命狂呼》系列揭開新序幕為驚慄片重新定義

玩厭恐懼鬥室，試過死神來了；你夠唔夠膽挑戰真正的恐怖體驗！？全新系列《奪命狂呼》2011年恐怖回歸。

2011年，荷里活著名驚嚇系列《奪命狂呼》(“Scream” Series)、《猛鬼街》(“A Nightmare on Elm Street” Series)導演，A級恐怖大師韋斯奇里雲(Wes Craven) 親自執導，再創新世代驚嚇片潮流，肯定嚇爆你！全新系列共分三集，保證每集有“驚”喜；頭炮就請來《Heroes》性感偶像希頓班妮蒂(Hayden Panettiere)、《羅馬假期》(When In Rome)上位美女姬絲汀貝兒(Kristen Bell)，以及Julia Roberts 姪女、《緣滿情人節》(Valentine’s Day)矚目新人王愛瑪羅拔絲(Emma Roberts)擔正！三位人氣青春女星，慘被連環殺手當獵物，尖叫指數極限級飆升！莉芙金寶(Neve Campbell)、歌迪妮覺絲(Courteney Cox)、大衞艾桂特(David Arquette)亦會再度聯手，延續恐怖玩味！重新啟動的殺戳遊戲，嶄新瘋狂的殺人規條，4月14日，《奪命狂呼4》 (Scream 4)！

動魄驚心全新獵殺規則邊個可以走得甩！？

距離上次大屠殺後十年，生還者薛妮(莉芙金寶飾)亦已經成為暢銷作家。一次返到家鄉作簽名會，重遇其他生還者-記者姬爾(歌迪妮覺士飾)及警長杜維(大衞艾桂特飾)。他們連同薛妮表妹Jill(愛瑪羅拔絲飾)、Kirby(希頓班妮蒂飾)等一班美女學生，隨即跌入新一輪恐怖狂潮當中，成為下一位死亡候選人！？！當年的鬼面殺手，已經悄悄地重出江湖。“他”不但挾着全新的殺人規則，還利用社交網站Facebook、Twitter、iphone apps等作殺人工具，來進行“升呢”版殺戳遊戲！連環兇手4度殺埋身，有哪個可以安全逃生！？當揭開鬼面殺手的真面目時，兇手會否連薛妮、姬爾或者杜維這些“死剩種”都殺過一個不留！？有邊一個可以夠大命，成為新一代死剩種?

瘋魔全球不朽恐怖經典三集狂收逾5億美元

《奪命狂呼》(1996年)

一個傳奇驚慄系列嘅誕生。《奪命狂呼》當年全球勁收1億7千多萬美元，至今依然係「美國史上最賣座血腥恐怖片」！電影更開創兇手例必以「規則」(Rules)殺人的先河。其後不少恐怖片都相繼仿效。

美國加州嘅平靜小鎮內，一個戴著鬼面行兇嘅變態狂徒出現；遇害對象全部都喺年輕貌美嘅後生索女，當中包括女主角薛妮。兇手擅長利用所有驚慄電影嘅公式，大玩殺人遊戲。若果要生存，就必須答啱關於恐怖片嘅問題；若果答錯，你條命仔凍過水！到底兇手會係邊位？係薛妮個喪妻老豆？定係佢位麻煩男友？抑或只係一位天生殺人狂嘅癲喪行為呢？

《奪命狂呼2》(1997年)

相隔1年，原班人馬開拍續集。《奪命2》全球總收1億7千2百多萬美元，僅以1百萬美元之差，成為「史上最賣座血腥恐怖片」第2位。為咗忘記第一集裡面嘅恐怖回憶，薛妮遠赴Windsor學院讀書。但係一部名叫《奪命狂插》嘅電影上映，令佢嘅平靜生活再被打亂。原來好事女記者姬爾將第一集發生嘅事件集結成書，並且改編成恐怖電影版本…《奪命狂插》試映時，兩名學生率先被殺，手法更加同第一集的“胡士堡命案”一模一樣。隨著越來越多學生遇害，新一代鬼面殺手會否是班裡其中一位學生，並正等待機會將薛妮殺死？

《奪命狂呼3》(2000年)

系列嚟到第3集，繼續氣勢如虹。《奪命3》除咗連續兩周成為開畫票房冠軍；同時更以1億6千幾萬收入，成為最賣座血腥恐怖片第3位。總結系列頭3集，總收入已超過5億美元！

話說女主角薛妮為咗忘記過去嘅可怖經歷，早已搬到北加州居住。但電影《奪命狂插3》正進行拍攝工作，並且相繼發生離奇命案，令薛妮迫不得已重返故地。

片場內，薛妮重遇電視八卦節目主持姬爾；以及佢嘅舊情人，現身兼電影技術顧問嘅杜維；同場仲有扮演佢哋三位嘅電影演員；以及為咗一炮而紅，而壓力爆燈面臨崩潰嘅導演…接二連三嘅兇殺案，似乎都同電影劇情有莫大關連。而經歷過「胡士堡」殺人事件嘅薛妮更慘成兇手頭號狙擊目標。到底今次鬼面殺手嘅真身係邊位？佢嘅瘋狂行為背後，又有咩動機？

總結對上3集經驗，鬼面殺手殺人嘅規則，大概有呢幾點：

唔係處女，死！
講「我好快返嚟！(I’ll be right back)」，死！
對住電話中人，問「你係邊位？(Who is this?)」，死！
答錯兇手問嘅問題，死！
獨自查看古怪噪音來源，一樣要死。

上述的殺人規則，經過三集大玩特玩之後，已經冇晒新意。身為恐怖片神級導演的韋斯當然要搞搞新意思。在2011全新系列中，恐怖規則已經重新定義。究竟墨守舊規則係咪唔駛死？除咗打電話，鬼面殺手仲有冇乜野方法可以不斷騷擾佢嘅獵物？更意想不到的殺人佈局；更驚嚇的行兇手段；更心寒的連環獵殺；等緊觀眾入場落足眼力，接受前所未有咁激烈嘅尖叫大挑戰！

奪命皇牌 VS 死亡候選人《奪命狂呼4》角色大解構

薛妮 (莉芙金寶飾)

元祖版《奪命狂呼》女主角。全新系列，講佢已經從當年嘅恐怖經歷當中恢復過嚟；仲出書做埋大作家。點知返嚟家鄉做巡迴簽名會，再次遇上姬爾、杜維，以及表妹Jill、Kirby等人；加上新一集《奪命狂插》(STAB)嘅拍攝工作，竟再次惹嚟鬼面殺手對佢嘅興趣。過去3集死唔去，今集會唔會就咁玩完！？

姬爾 (歌迪妮覺絲飾)

元祖版《奪命狂呼》骨幹人馬之一。同薛妮好唔同，姬爾並無被過去嘅恐怖遭遇所纏繞，反而將佢寫成過去6集《奪命狂插》的原著故事，因而大受歡迎。但好景不常，今時今日佢已經再「無貨交」。正處於靈感失蹤之際，再加上同老公警長杜維嘅感情出現問題，令到姬爾極之唔開心。於是佢單挑鬼面殺手，試圖重新揾返創作泉源。

杜維 (大衞艾桂特飾)

元祖版《奪命狂呼》另一位骨幹人馬。盡忠職守嘅好警長，更加係薛妮嘅好朋友，過去3集都保護佢脫離危險。但今集面對新世代鬼面殺手嘅挑戰；對於呢位唔係好“曉”上網為何物嘅阿叔嚟講，會唔會幫唔上忙，反而連累好友身亡！？

Jill (愛瑪羅拔絲飾)

薛妮表妹，又靚又索嘅女大學生；今集女主角之一。一直只係從傳聞中認識薛妮嘅佢，自從薛妮回歸家鄉之後，身邊就不斷有怪事發生；由於佢同薛妮有莫大關聯，自然成為鬼面殺手喺今集嘅頭號追殺目標

Kirby (希頓班妮蒂飾)

聰明、靚女、轉數快；口沫遮攔嘅超級電影愛好者。作為Jill嘅老死兼負責製作新一集《奪命狂插》的其中一份子，佢亦不幸成為鬼面殺手嘅目標之一。

Chloe (姬絲汀貝兒飾)

Jill另一死黨好友；性感又火辣。佢會唔會只係配角一名，開場無耐就玩完！？

Robbie (艾力朗臣 Erik Knudsen 飾)

電腦宅男，精通電影、互聯網知識。一直希望將《奪命狂插》系列延續落去。更加熟知新舊兩代《奪命》主角嘅資料。佢會唔會就係新一代鬼面殺手！？

荷里活首席恐怖大師韋斯奇里雲Wes Craven 創始超級經典《奪命狂呼》、《猛鬼街》

出道初期，曾經跟隨《13號星期五》(Friday the 13th)導演桑恩根寧咸(Sean Cunningham)一段時間，並成為佢嘅助手、編劇兼剪接師。直至拍成第1部成名作《隔山有眼》(The Hills Have Eyes)，被英國Time Out雜誌稱賞為「完美融合咗諷刺寓言，以及緊張劇力嘅作品」，Wes Craven嘅才華先至真正受到肯定。

1984年，Wes Craven更加迎接咗佢事業上第一個高峰，以嶄新嘅恐怖片觸覺，創作咗不朽恐怖片經典《猛鬼街》；更發掘咗巨星尊尼特普(Johnny Depp)。以如幻似真嘅夢境作為行兇場所；只要你一瞓覺，鬼王Freddy就會入夢「隊冧」你。真實與夢世界交纏嘅獨特意念，開創恐怖片先河，令到電影多年來一共拍咗9集之多。整個系列喺美國本土更錄得，超過3億7千幾萬美元收入。大部份集數，Wes亦都有身兼編劇一職，以保持影片嘅質素。

革新恐怖懸疑片定義啓發《恐懼鬥室》、《死神來了》誕生

完成咗《猛鬼街》系列之前，Wes將大部份時間都集中喺電視製作當中，例如《Nightmare Café》，《Twilight Zone》等，甚少接觸電影。只係間唔中拍攝一兩齣作品自娛，例如《隔山有眼2》(The Hills Have Eys 2)、《長途嚇機》(Red Eye)；以及温情作品例如《巴黎我愛你》(Paris， je t’aime)。直至1996年，呢位大師睇唔過眼當時嘅恐怖片毫無新意可言，於是決定出手，打造咗另一個經典電影系列《奪命狂呼》。

3集《奪命狂呼》，令到Wes Craven嘅名字再次為新世代所熟悉；系列票房亦勁收超過5億美元。故事瘋狂地諷刺古今中外，所有恐怖電影嘅陳腔濫調之外；同時又由兇手限定「死亡規則」，等觀眾清楚知道點樣先要死；邊個犯咗規就會即刻被殺，令觀眾更加肉緊。至於死剩種亦會被兇手步步進逼，逐個無命。之後推出嘅《恐懼鬥室》(Saw)、《死神來了》(Final Destination)等恐怖片系列，當中嘅殺人規則，以至鬥智扭橋等內容，明顯充滿住《奪命狂呼》嘅影子。《舊年暑假搞乜鬼》系列，更係由《奪命狂呼》其中一位編劇奇雲威廉遜所創作。你話唔係「參考」Wes哥嘅風格去創作,大概都幾難揾人相信！

公映前夕幕後訪問片段率先公開各人大爆不為人知小秘聞！

隨住上映日期日漸逼近，更多電影相關資料亦都陸續曝光。其中一段由網站TrailerAddict提供嘅幕後訪問片段，就透露咗唔少有關《奪命狂呼4》嘅小秘密！

訪問中，大衞艾桂特坦白承認，同前妻歌迪妮覺絲係因為拍攝首集《奪命狂呼》而認識。繼後嘅第2、3集入面，佢哋由若即若離嘅情侶，發展到第3集嘅訂婚；再到今集和平分手；《奪命》系列可謂見證住佢哋人生中最重要嘅階段。歌迪妮覺絲更加形容每次拍攝《奪命狂呼》，就好似歷經一次又一次嘅演化(Evolution)過程一樣；每次都有新體會。
雖然已經第4次合作，但莉芙金寶就爆料，原來同歌迪妮覺絲一直以來都「無乜兩句」！由於莉芙長居英國，歌迪妮就住喺洛杉磯，所以兩位甚少見面。直至《奪命狂呼4》開始拍攝，兩位相隔10年無見嘅女主角先至「Click」得著，互相交換Facebook、Twitter，成為real friend！
相隔10年再次見面，恐怖敎父Wes Craven話最開心嘅唔係可以見番一班舊朋友，而係可以將上個世紀由自己創造嘅角色大肆遭質一番。換言之，唔通今集主角薛妮會打破「不死定律」，要被鬼臉殺手殺到血流不止！？
全新加盟嘅愛瑪羅拔絲喺訪問中表示，自己特登喺拍攝新一集《奪命狂呼》之前做足功課，嘗試一口氣睇完對上3集《奪命狂呼》；但最後都唔成功！原因並唔係佢忙到無時間噃；而喺佢全程用張被遮住自己對眼唔敢睇，仲要比班friends笑佢生人唔生膽，真係瘀到爆！