肥傾天下、腩震武林的熊貓阿寶3D現身，今個暑假爆笑回歸探影迷﹗瘋魔全球的《功夫熊貓》大受各地歡迎，各路英雄都叫好叫座﹗今年《功夫熊貓2》再度出山，一定令望穿秋水嘅各地百姓雀躍萬分﹗積伯克、安祖蓮娜祖莉、德斯汀荷夫曼、薛夫洛根及成龍等粒粒荷里活巨星，繼續聲演各位動物高手﹗香港方面，上集配音人馬陳奕迅、成龍、房祖名、何韻詩繼續搞鬼配音，今次更有國際華人女星楊紫瓊隆重加盟聲演全新角色；陣容鼎盛，你點可以錯過？
武林再次風起雲湧！話說邪惡奸狡嘅沈老大妄想以新發明，謀害武林正道。慣咗食好住好嘅「龍戰士」阿寶，奉施福大師之命,連同「蓋世五俠」齊齊下山，前往沈老大嘅巢穴「宮門城」，搗破邪惡奸計。但呢個時候，阿寶至發現自己原來與沈老大並非素未謀面；而沈老大背後，更加隱藏住有關阿寶身世嘅重要真相！為咗揭開自己嘅身世之謎，以及阻止沈老大稱霸武林；阿寶只好再度施展正義肥拳，聯同「蓋世五俠」，齊齊出手；用功夫，摧毀可以消滅功夫嘅神秘兵器﹗
《功夫熊貓2》再創5大新招 你梗要買飛入場睇！
嚟到續集，《功夫熊貓2》當然有加入新元素，觀眾入場前一定要知：
● 《功夫熊貓2》導演，係華裔女導Jennifer Yuh Nelson。Jennifer歷任夢工場動畫電影包括《功夫熊貓》、《荒失失奇兵》、《仙巴七海遊踪》，以及《Spirit: Stallion of the Cimarron》等嘅幕後工作。佢喺加盟夢工場之前，曾經到過澳洲、韓國及日本等地嘅動畫公司汲取經驗；其後，她更於HBO Animation執導過動畫電影《Spawn》。電影順利成為1999年艾美奬“傑出動畫節目奬”(Outstanding Animated Program)，可見她的導演功力，實在無可置疑。
● 《功夫熊貓》嘅魔力，可謂遍及地球上各類生物！今年二月初，喺美國Atlanta Zoo就有一隻出世三個月嘅熊貓BB，被命名為“Po”。呢隻2010年全美唯一一隻出世嘅熊貓BB，更獲得真人版「阿寶」積伯克，親臨動物園為佢助興添，認真犀利！
● 今集包括導演Jennifer Yuh在內的劇組人員，專登走到中國大陸，包括：平遙古城、少林寺、北京舊城區、四川成都，以及大大小小不計其數嘅道祠佛寺，進行實地考察及取景，難怪今集嘅建築物，仿真度極高！
● 唔講唔知，今集眾多角色入面，被動畫師一致認為最難處理嘅並唔係主角阿寶，而係新歹角沈老大。事關要模擬做出雀鳥羽毛嘅難度，原來遠比動物毛髮為高。主要係因為毛髮即使稍有交叠，人類視覺上仍然可以接受；但羽毛若果出現重叠情況，就會相當明顯。所以沈老大身上嘅羽毛，可謂「條條值千金」。
● 另外，為咗突顯沈老大「富二代」嘅高貴特質，佢所使出嘅功夫路數亦要與眾不同。「導演要求沈老大嘅動作，要以優雅為前提；所以我哋花費咗好多時間去設計佢每一個微細動作，直到滿意止！」身兼動畫總監(Supervising Animator)及動作指導(Resident Martial Arts Advisor)嘅Rodolphe Guenoden表示。
● 今集除咗3D效果之外，各樣物件嘅仿真及細緻程度，亦成為動畫師們其中一個耗費最多時間嘅地方。例如其中一幕講天機娘狂嚼沈老大件絲質「飲衫」嘅場面，劇組動畫師就矩細無遺到分別將羊嘅牙齒；絲綢布料嘅質地；甚至係件絲質衫遇到口水後會產生咩變化，都一一模擬出嚟，可見佢哋嘅細心獨到。
人物介紹
阿寶 (粵語配音:陳奕迅/英語配音:積伯克Jack Black)
阿寶的家族三代均是煮麵大師，但他卻夢想可以成為武林高手，闖蕩江湖！陰差陽錯下，食極唔夠、肥膏一嚿嚿、瞓醒又要抖兩抖的阿寶，竟被選為身負拯救武林重任的「龍戰士」，對抗天下第一高手大豹。雖然阿寶功夫流過流華，但他從不放棄，終於給他找到成為真正高手的奧秘：「乜都唔識，怪招出擊！」
功夫特色：出招慢吞吞，打交靠大躉
絕招：腩肉凸擊、無敵仆樓梯
身為荷里活新一代笑匠，積伯克今集要同熊貓阿寶齊齊「升呢」。「上集主要講阿寶晋身成「龍戰士」嘅過程；今集就集中描述佢同 『蓋世五俠』嘅連串歷險。喺對付沈老大嘅旅途上，大家將會見到更多更奪目嘅3D武打場面，節奏更明快。暑假記住入戲院，一齊『Sai-Sai-Woo-Wee』！」
施福 (英語配音：德斯汀荷夫曼)
功夫大師施福，是武林中最出色的武術導師，訓練出「蓋世五俠」。可是施福因為過去曾犯的一個錯誤，令他不苟言笑，終日黑住口面。今次，他要面對他教授武功生涯史上最嚴峻的挑戰，將一隻又肥又笨的大熊貓，訓練成傳說中拯救武林的高手。
功夫特色：能以最少的動作，發出最大的威力。招式簡練、快如閃電！
絕招：無錫擒拿手
當人人都讚今集3D效果有幾「得」之際，「施福大師」德斯汀荷夫曼卻認為今集最大賣點，反而係「愛徒」積伯克嘅「演出」。「有時都分唔清到底係佢創造緊阿寶呢個角色，定係阿寶影響緊佢嘅表現。佢哋兩個已經合而為一喇！」
蓋世五俠
飛虎女 (粵語配音：何韻詩 / 英語配音：安祖蓮娜祖莉)
飛虎女是蓋世五俠之首。她具備一個大俠應有的所有條件：律己以嚴，而且非常勇猛，擁有俠義心腸。可是她卻不相信阿寶能成為拯救武林的「龍戰士」，認為這只是一樁笑話。
功夫特色：速度與力量兼備，體格強壯。出招剛烈威猛，充滿攻擊性。
絕招：黑虎偷心
能夠再次聲演飛虎女，安祖蓮娜祖莉認為今集飛虎女變得更加體諒身邊朋友，更似一個領袖、武者。至於問到今集賣點，佢大sell力讚咁話：「有精彩武打、抵死笑料、仲有3D，直頭好睇到暈。我會第一時間同班仔女入場欣賞！」
靈猴 (粵/英語配音：成龍)
樂觀、友善又頑皮的靈猴，是蓋世五俠中最平易近人的一個。他靈活多變的性格，同時造就出他靈巧的武術風格。很喜歡聽笑話，因此算是和阿寶較合得來的一個。
功夫特色：靈巧、出奇不意、敏捷、動作密集，擅長棍術
絕招：猴子偷桃
毒蛇 (英語配音：劉玉玲 Lucy Lui)
毒蛇是個令人出乎意料的武術高手，她可以是魅力四射、婀娜多姿的美蛇，下一秒卻可使出上乘老練的功夫。她的動作靈巧之餘，出招準確、輕功超凡。
功夫特色：以柔制剛，動作纖巧玲瓏，更懂得用自己修長身體緊纏對手，反過來利用對手的力量。
絕招：蛇形蕉手
仙鶴 (粵語配音：房祖名/英語配音：大衞確斯David Cross)
仙鶴在蓋世五俠中擔任褓母的角色，因為他是五人當中最冷靜沉著的一個。每當遇上爭執糾紛，他都盡可能去和解，但如果逼不得意需要動手，他卻不會手下留情，盡全力取勝。
功夫特色：招式優雅、舉重若輕。動作有如流水行雲，不花無謂力氣。
絕招：仙鶴神針
猛螳螂 (英語配音：薛夫洛根Seth Rogen)
蓋世五俠中，體形最小的一個，但他從不將這視為練功的障礙。身體雖小，但他卻力度十足、速度更是無人能比。說話尖酸，而且不能容忍任何人對他出言不遜，小小的身軀中卻有著無比勇氣。
功夫特色：動作迅雷不及掩耳，每次出招均經過深思熟慮，針對敵人弱點。
絕招：螳螂捕蟬
全新角色
天機娘 (英語配音：楊紫瓊)
世代掌管「宮門城」(Gongmen City)的家族：沈老大(Lord Shen)一家的忠實顧問；睿智無比，擁有預知未來的能力，更曾經預言熊貓將會是沈老大的終身大敵，觸發沈老大將熊貓一族趕盡殺絕。今次她再見阿寶，就更加深信自己當年的預言，即將成真！
專長：喜歡以「猜謎語」形式去預言事件，偏偏每次預言都十分準確。
沈老大 (英語配音：加利奧文Gary Oldman)
一集患有白化病的孔雀。原本是「宮城門」(Gongmen City)的未來繼承人，但年少氣盛的他，當年被天機娘(The Soothsayer)預言終會被一個「半黑半白」的勇士所擊敗，於是憤而屠殺熊貓一族，令到阿寶變成孤兒；他亦被父母逐出城門。今日，他發明了聲稱能夠克制「功夫」、天下間最具殺傷力的武器；並要叫「功夫」從此消失。因此，施福大師就派出阿寶以及五俠，出手制止沈老大的狼子野心，觸發新一輪武林大戰！
功夫特色：孔雀鐵扇功，鋒利無比，問你點避！
絕招：孔雀開屏；能克制天下所有功夫的「神秘武器」
負責聲演全新角色─沈老大嘅加利奧文，認為老沈係一個與別不同嘅大奸角：「佢攻擊嘅時候，似跳芭蕾舞一樣，動作優雅。但係今集最吸引我嘅，就係電影內嘅感人故事，仲再加上係《功夫熊貓》續集，無理由唔睇。」
雷霆犀牛大師 Master Rhino (英語配音：域陀加伯Victor Garber)
為人機智、幽默，傳說中嘅一代大俠。手執傳說中的「雲錘」作為兵器，現任守衞「宮門城」的大當家。雷霆犀牛大師出身自功夫世家，並憑藉一己之力擊殺萬條毒蛇，而成為家傳戶曉的人物，深受天下英雄尊敬。的英勇事蹟也成為一代傳奇人物。
風暴牛大師 Master Ox (英語配音：丹尼希斯堡Danny Haysbert)
雷霆犀牛大師最得意嘅弟子。曾經有徒手生擒72名土匪嘅驕人紀錄。性格衝動，名副其實嘅「行動派」；但同時亦是一名忠誠的朋友，以保衞百姓為己任。
凶鱷大師 Master Croc (英語配音：尚格雲頓)
曾經係惡名昭彰、專偷羊毛嘅賊黨首領，其後在與雷霆犀牛大師的決鬥中慘敗後，決定改邪歸正。從此， 凶鱷大師就跟着犀牛大師四出抱打不平；以威力無比的鐵球尾巴，鋤強扶弱，成為武林正道的中堅份子
武功：鐵尾功
絕技：橫掃千軍
今次聲演凶鱷大師，尚格雲頓坦言好興奮：「第一集用國寶嚟做主角已經夠破格；今集有我份，自然更好睇喇！我聲演嘅凶鱷大師係一個手短腳短，但尾功好鬼犀利嘅角色。佢嘅動作更令全個錄音室啲人都大笑！」
狼幫主 Wolf Boss (英語配音：丹尼麥伯 Danny McBride)
狼幫主以及一班狼守衞，是沈老大最忠誠嘅手下；身兼軍事參謀嘅佢，力氣異常強大。
首次為《功夫熊貓》配音嘅丹尼麥伯，就大讚台前幕後工作人員，尤其係積伯克及導演Jennifer Yuh Nelson。「我第4次同阿積合作，佢為人搞笑，根本就係真人版阿寶；至於導演Jen，佢永遠都保持工作熱誠，同佢合作好鬼爽！」
電影資料
電影名稱：功夫熊貓2 (Kung Fu Panda 2)
上映日期： 2011年7月21日
香港發行：洲立影片發行(香港)有限公司
圖片集
