《開心直航》3月26日全城喜飛冇Delay

貴為當今最受歡迎日本導演之一,《五個撲水的少年》《喇叭書院》矢口史靖重本炮製最新喜劇《開心直航》,陪大家衝上雲霄,大喊大笑﹗當紅青春偶像《我的機械人女友》綾瀨遙,配搭實力派男優《NaNa 2》田邊誠一開心主演,加上日本至尊級諧星《交響情人夢》竹中直人客串演出,呢班多Joy多難嘅國際航機鐵定3月26日開心升空,感動降落﹗

空中小姐悅子(綾瀨遙 飾)對自己可以參與期待已久嘅國際航班工作十分興奮,決心事事做足一百分﹗點知一班大師姐平時高貴迷人,原來在機艙休息室裡不止喪食貴價飛機餐,連對高踭鞋都除埋走去做腳底按摩﹗起飛前意氣風發嘅機師新手鈴木(田邊誠一 飾),在遇上強大氣流時竟只識「騎呢」哈哈笑…兩個飛行初哥,怎樣與乘客一起化驚險為「Happy」?

《撲水》導演吹響《喇叭》 《開心》實境拍攝,一絲不苟

史上首次747客機內拍攝電影
為咗令到一班經常往返日本嘅『哈日』人士有更大投入感,《開心直航》導演矢口史靖堅持在機場以及機艙內作全方位實境拍攝。經過多番相討,最後航空公司ANA願意出『機』相助。唔講大家唔知, 原來呢次係ANA破天荒首次,答應借出真實飛機俾電影作場景之用。他們更加特別調整航班班次,以便騰出一架747珍寶客機, 認真唔話得。

雖然有架飛機任你『舞』,但都唔代表一切拍攝都會順利進行。因為在機航之內, 空間限制可謂十分之大。行人通道已經要比平時戶外場地狹窄幾倍,加添咗拍攝嘅難度;另外,由於進行錄音時,唔可以開空調同窗。於是超過100位工作人員+導演+演員,就一直在呢個好似桑拿室嘅機艙裡面,渡過連續150小時、無休止嘅拍攝工作,真係辛苦咁多位喇!

日本最繁忙機場實況 100%呈現
此外, 導演希望以日間嘅羽田機場為舞台,營造出真實感覺,但呢個全日本最繁忙機場, 平日已經插針都插唔入, 所以一般都唔接受任何拍攝申請。好彩多得機場管理局以及國土交通省『出手』,加上ANA『出面』擔保,工作人員先可以喺午夜12至5拍攝,至於日間場景就移師到關西國際機場。

女演員變身正版制服女郎
電影中所有制服,全部係由ANA提供拍攝嘅『正版』貨。從08年更換咗全新第九代制服以來,ANA一直對穿著該公司制服嘅人士,有一套嚴格規管。但當今次聽到主角陣容,包括有綾瀨遙以及吹石一惠呢d人氣美女之後,佢哋都100%放心。可以絕對肯定,制服空姐高貴大方嘅形象,不會受到影響。 另外,主角們係拍攝期間,均帶有屬於自己嘅名片、絲巾同袋巾。完成每日戲份之後,更加會鎖好呢d小道具,以免遺失,真係當正自己係真正空姐一樣。

機場『六條ACE』 各個崗位職務大解構

大家登機前,大可率先了解機場內各個崗位的職責所在,以便遇到突發事件時,可以消災解困,阿彌陀佛!

控制員
做這個崗位,最緊要識分東南西北。事關要不時向飛行中嘅航機,發出正確路線指示,跟手可以引領埋佢哋安全著陸,成班航機冇Delay,咁就為之Very Good!

機師
可能係人類世界上最英氣嘅職業。主要工作,係負責將乘客安全送到目的地,遇着『風吹草動』,有緊急事故大單嘢發生時,佢哋就會變身為機內嘅總指揮官,嘩!帥。一般短途機,都會由正副機長組合駕駛,只有遠至歐洲或美洲嘅長程機,先會由三人操作。

地勤
簡而言之,即係機場公關。需要於機場內不同地方,直接『硬食』乘客投訴。另外仲要售賣世界各地機票、接受旅客查詢、幫乘客Check in……唔係做戲俾你睇, 呢個真係乜都要做嘅崗位。

機倉報務員(CA)
親切d,可以叫佢哋『空中小姐/空中少爺』,實情佢哋仲有個秘密身份。為乘客提供舒適嘅服務係佢哋嘅首要使命。不過CA最重要嘅工作,竟然係支援航機安全嘅『保安要員』。每班機CA嘅人數,基本上同飛機逃生門數量成正比,以確保有足夠人手,協助緊急逃生。

司令部(OCC)
Operation Control Center。司令部,負責『吹雞』,指揮全世界所有屬於自己公司嘅飛機。唔理你係乜嘢『地盤』,機師又好、維修人員又好、調度員都好,都要聽佢支笛行事。24小時全天候長駐機場工作,仲猛過特首.

維修人員
一般分三種;一)主要負責飛機起飛前、降落後嘅維修;二)喺維修庫幫飛機作全面檢查;三)駐專門工場維修引擎、計時器、電腦等,呢類可以從機身拆除嘅機件。

《開心直航》服務人員名冊

一般航班都會有一眾機組人員為大家服務,而《開心直航》之上,就有佢哋幾個;

齊滕悅子(綾瀨遙飾)


來自廣島嘅佢,第一次試飛國際線道就遇着一班勁hea空姐前輩,都咪話唔驚。 佢專長係笑。得戚果陣會儍笑、唔開心果陣都係笑。喊?最多係匿喺洗手間先喪喊。喜怒形於色,係一個好容易俾人睇穿嘅女仔。佢另一求生技能就係『飛天蛋糕』,亦即係空中整餅。新鮮熱辣,Homemade Style,乘客好buy架。

鈴木和博(田邊誠一飾)


航班嘅主機師。外表睇好似充滿自信,成日要衝上雲霄。實情驚青膽小兼怕事,飛機震兩下都嚇到『噴飯』。為咗完成飛行訓練成為副機師,局住頂硬上,偏偏又遇着魔鬼敎官。真係要得閒還神先得喇。

原田典嘉(時任三郎飾)


客機機長。可能佢出世就已經係咁嘅『尊容』,所以注定佢要成為一個人見人怕嘅魔鬼機長。最出名係幫新仔mark分嘅時候又嚴又苛刻。當大家以為係幻覺,估佢其實係好人嘅時候,實情佢真係一個壞人。永無口硬心軟,一心抱住『睇你點死』嘅心態。飛機出事的話,佢一定篤個副機師出嚟『祭旗』。

田中真里(吹石一惠飾)


航機上面嘅資深空姐。無時無刻都要保持最佳狀態。貪靚到死嘅佢,午餐嘅時候,都要做吓腳底按摩先滿足。至於調敎新人有咩心得?Well,好簡單,佢會由得佢哋去闖禍,俾乘客鬧到喊為止。好殘忍吖!

山崎麗子(寺島忍飾)


『微笑+躹躬』,係佢嘅標記。佢係航機上嘅空姐主管。畢生理念都認為,空姐係一個群體。所以係佢管理之下,每位空姐都要有良好嘅啖吐、行路姿勢同送餐禮儀‧當有突發事件嘅時候,更加要義無反顧咁去維持機上秩序,係一個行事慬慎嘅女主管。

速報;9個成為空姐/空少的條件

空中小姐、空中少爺,一直都是大家夢寐以求嘅工作。無他,既可以免費旅行周圍飛,又可以見盡靚人靚衫。一個唔覺意被星探經理人睇中,出埋唱片做埋明星都真是閒事一樁。之但係,大家發呢個白日夢之前,知唔知要做個『資優』機艙服務員需要d咩條件?碌大隻眼,睇落去就知。

跟據各大航空公司嘅不明文行規,大致可以分為『外在』、『內在』條件兩大類。

先講下『外在』條件;

-香港中學會考程度,英文科(課程乙)合格 (中文唔合格點計!?)
-伸手可觸及高度達208厘米 (超過呢個高度會唔會有奬金架!?)
-須擁有香港永久居留權 (呢樣簡單,香港周街都係,大陸都有唔少)
-能閱讀和操流利英語、廣東話或普通話 (有懶音『典』算,咁咪好『橙』!?)
-具服務性行業經驗者將優先考慮 (行街企堂算唔算服務行業!?)

跟手睇埋『內在』條件;

-具備無備不致『愛心』一顆,隨時要幫乘客執漏,例如執假髮同執垃圾
-擁有堅毅不屈『忍耐力』一打,方便被乘客喪鬧時,仍然可以保持最佳笑容
-裝有食物焚化『神仙肚』一個,即使只有5分鐘,都可以徹底清哂份晚餐
-配備至in潮流『觸角』一對,因為無時無刻要打扮靚靚,同乘客合照

若果閣下具備以上條件,請無需帶備任何身份證明文件以及學歷證書,前往《開心直航》應徵。因為你係百年難得一見嘅艙務員『奇材』,唔做簡直愧對你爸爸!?

《開心直航》機艙冷知識

Q: 點樣分辨機師職級?
A: 現行嘅飛機機師體制入面,啱啱完成機師培訓嘅新手,就成為二副機長,在此之上,依次分別有;初級副機長、副機長、高級副機長,以及機長。要正確分辨佢哋邊個打邊個,就要留意佢哋嘅肩章喇!一般嚟講,二副機長會有一橫係肩章上面,初級副機長有兩橫,如此類推。最高為機長,擁有五橫肩章。今次主角鈴木登上飛機嘅時候,仲係身戴三橫肩章,即係副機長一名是也。咁搞法,穩唔穩陣架。

Q: 空姐指甲唔可以長過1毫米?
A:大家喺享受機艙服務員殷勤召待嘅同時,有冇留意到唔同航空公司嘅制服,都有著唔同嘅特色呢?例如會設計富民族色彩嘅制服;又或者以不同配件(頭巾/領巾),去表示該位服務員嘅等級、年資等;另外,仲會規定服務員指甲唔可以長過1毫米、唇膏顏色亦都要以鮮艷為主,方便乘客能夠分辨清楚。照咁睇,做個100分嘅空姐/空少,真係唔易。

把新科技帶給學界 -「人工智能」產業的未來

得悉本屆「國際人工智能物流挑戰賽」完滿結束,並且相當成功。希望藉此採訪協辦方,COCOROBO 行政總裁兼創辦人 辛海洋博士 對於參與的過程、心得及總結。

咩係「遙距營商計劃」D-Biz 話哂你知

新冠肺炎疫情持續,創新及科技局早前就宣佈,在政府第二輪防疫抗疫基金下,將會推出為期 6 個月,為數 5 億元的「遙距營商計劃」(Distance Business Programme, 簡稱 D-Biz),資助企業利用創新與科技,幫助各行各業創出生路、撐過疫情。到底「遙距營商計劃」是甚麼來?幾時申請?甚麼公司才有資格?又如何申請?在這篇文章中,小編會整合所有你需知的資料,只要看完這篇文章,就可以一目了然。 什麼是「遙距營商計劃」(D-Biz)? 政府推出「遙距營商計劃」(D-Biz),目的是幫助各大小企業在疫情期間,能夠利用資訊科技開拓新的發展方向,從而能夠繼續營運和提供服務。 D-Biz...