你咪話手機鏡頭好壞唔緊要!

買手機要睇下支鏡仔得唔得

時下手機潮流興玩Smartphone,唔論你iOS好、Android好、Symbian又好、大陸山寨機都好,冇個好鏡頭比你影下野拍下片你就更係周身唔聚財。嗱,你唔好話電話係攞黎打出打入既姐,攪咁多野做乜呢?計我話齋打出打入咁又何苦比多左錢買智能手機呀,去鴨記買部$169既阿伯用LG打飽佢囉!不過依本瘋影所見,絕大多數山寨機個相機質數都唔多掂,影阿婆同影磨豆出黎都差唔多(咁曚),如果你話搵到部得既,麻煩你影果部機個樣黎睇睇。吓,點解唔問你個牌子?喂阿哥仔,你都知你見到或你用緊果部機既「嘜頭」可能全球得果一百幾十部!話明山寨機啦,個牌子貼上去或印上去之嘛,話左比人知都係有99.9%可能搵唔到,係咪認樣好過呢?

講返正題,點解手機鏡頭咁重要呢?大家成日係youtube搵野黎睇,實記得幾年前既「巴士阿叔」啦、「雞巴男」啦,最近有「頭文字B」、「港童喪罵老豆」同「野蠻夫婦」等等,上哂新聞雜誌兼且好多noise添!呢個全部都歸功於手機有個鏡頭比我地去做實地拍攝,唔好話要去影人D衰野,至低限度有事發生時可以保護下自己先。如果個部手機拍得蒙查查,人家又點可以幫到你呢?就算自己睇返都少左好多樂趣啦!

重有就係自拍成風後,女女男男都會隨時自拍一翻,有手機既情況實多過有相機架啦,雖然前置鏡頭多數都差好遠,用返機背果支斷估都會影到掛!咁自拍左之後又點呢?更係上去facebook或者微博分享比D老友同埋傾慕者睇啦,你話個鏡頭唔得又點夠膽upload先?

img_20101128_203937rs
呢張就麻麻喇!

講開鏡頭好唔好,首先大家要知道既野,就係像素唔代表一切既,一部韓系同一部山寨機都係300萬像咁有冇分別呢?更係有啦,分分鐘重好大添!本瘋影唔係話Made in China既機唔掂,iPhone都係Made in China啦,咪幾好;而係講山寨機,即係價錢平到笑,功能人有佢又有,連人冇佢都有既不知名手機。對於華為呀、中興呀呢D去到國際級既大廠,「理論上」呢兩年既機應唔會差得去邊,但有時某D型號本來用黎援助第三世界,而咁啱又比你買得到就真係祝你好運喇!

imag0051
HTC Incredible S 影出黎夠sharp,重有景深比你玩下。

你問靚鏡有乜實際用途先,求先講既都好實際丫係咪?嗱,我再舉個真實個案喇,某人有次扐部手機去試嘟嘟碼,點知部手機近D就老花,完全對唔到焦;到對到焦時又細個粒豆,鬼嘟到咩,攪到拉牛上樹唔知點好!萬一當時剛剛係2012洪水上到喜瑪拉雅山腳,個嘟嘟碼係要黎開鎖入去娜亞方舟避難既話咁就大鑊喇!好在本瘋影明察秋毫既話,知道唔關個Apps事,唔係間開發公司又要食一隻大死貓!

iphone4s
蘋果迷就一定係呢部iPhone 4s

我知你又會再問,乜野手機既鏡頭好呀?iPhone4S囉!蘋果發覺之前部4落後左,4S集中哂去谷個影相同拍片功能,唔得既話實比人話佢老坤。好喇,你話瘋影咁講即係同人講阿媽係女人一樣。嗱,又講多個幾個牌子比你聽下喇, HTC、Samsung、索愛既手機影相拍片都OK架,某D型號重好正添!不過事先聲明,機價有平有貴,銀碼細果D就更係會掙咁少少啦,呢樣野唔駛講大家都知好正常既。

好喇,係時候要同我果十部八部電話差下電先,Byebye!

(一代瘋影)

Pokémon! 日夜充電去取勝!! thecoopidea Pokémon Pallet 無線快速充電板

今次介紹這個新產品,相信比卡超迷一定好鍾意!呢款最新推出的 thecoopidea Pokémon PALLET 無線快速充電板,有 3 個款式分別是紅色的精靈球、藍色的超級球與及黃色的高級球,非常之吸晴。

大師級中西合璧NFT創作善舉

由香港國際青年藝術家協會舉辦《藝術無枷鎖》(UNLOCK)藝術展覽,將於九月三十日至十月三日於饒宗頤文化館舉行。當中已是「九十後」的黃配江(黃老師)再度參展,以非傳統書法和水墨技術與西式繪畫互相融合而聞名。 多年來以不同的身份活躍於藝術界,作品亦隨心下筆,不受規限束縛,成就了一幅幅瀟灑傑作。大眾可以在博物館、畫廊和私人收藏中看到其作品的踪影。同時,他是一名藝術教育家,有不少當代成功的藝術家也曾是他的學生,受到他的啟蒙。今次,黃老師繼續突破虛實的框架,首次將作品轉成NFT並將收益用作慈善用途。大家可以拭目以待是次新舊融合的創舉。 展覽詳情 :日期 : 2022年9月30日至10月3日時間 : 上午10時30分至下午6時地點 : 九龍美孚青山道800號饒宗頤文化館F座下層展覽廳

防跌防撞功能出色 TORRII Torero iPhone 14 系列保護套

傳統手機配件商 TORRII,過往幾代 iPhone 都有為其出產配件,今代都當然不會例外。TORRII Torero iPhone 14 系列保護套,採用纖薄設計,保持 iPhone 14 最佳使用體驗。但未有讓薄身設計減低對手機的保護能力,採用柔軟、靈活和減震的 TPU 框架的雙材料結構,包圍機身四邊,在機背主鏡頭部份也具備圍邊設計,避免刮花。而堅固的光學級聚碳酸酯底座,提供全方位保護,防止撞擊跌落,更附設全方位多功能指環扣,既有著預防手機掉落之作用,亦可用作影片支架......