- Advertisement -
早前無無聊聊咁上網搵下片睇，先至發現原黎qk123有條片係偷雞咁用手機去拍！你問瘋影點知，睇個「賭」就知啦，只有手機個芒係咁既比例既啫！心諗乜個記者咁鬼慳家，Cam都冇部走去拍，重要打正係牌咁upload。之但係睇落，咁惡劣既環境都拍到有聲有色，部機又真係得得地喎……
可能你都有睇過，就係向我地香港著明地標，一提起熊貓就諗起佢，一提起佢就諗起阿盛智文既海洋公園。呢條片係係果間乜3D鬼院定唔知鬼屋度拍，除左投射出黎既片之外成間房都黑媽媽，好多機自動對焦都應該拉哂手風琴，但部手機又拍到喎！咩話？部手機用手動對焦？唔好玩啦，有你都唔會用啦下嘩，地方又黑，個畫面又閃黎閃去，你估你雙眼會睇得清楚邊個位shape咩？就算得，條片咁短，set啱都收得工囉！
再問問編輯，原黎係一部HTC機黎既，用返現場聲出街。據聞當時個情況係做一個預覽，比一班傳媒睇左先，然後再影相，咁既然唔會有燈閃黎閃去，個記者就有理冇理攞部手機出黎拍左片先，條片出左黎都有D人睇下，咁又比佢搏到！
照返個現場環境咁講，日常呢部機真係冇乜野拍唔到，包括夜媽媽有賊入屋、深宵街邊食腸粉、漆黑後巷打野戰（我講D貓公打交咋，唔好亂諗野呀！）等等，起碼都睇得到內容先丫。
當你諗深一層，個記者都唔係慳家，話哂部機都四千港紙過外，比起一般DC仔都唔算平，咁拍片有返咁上下又好合理啫係咪？你話個感光片細會noice多？實在都係講開果句：「影到同影唔到」，當你乜都影唔到，塊野幾大幾靚都係得個吉既啫，最緊要係有野睇嘛！不過無論點都好，今次都實在係令人唔敢睇小D高智能手機，比多少少錢都唔會嘥既。
（一代瘋影）